Sunday, August 14, 2022
Homeમીઠાઈકેટલીક ખાસ ટિપ્સ સાથે 100% મીઠાઈ વાળા ની દુકાન જેવી ક્રિસ્પી જલેબી...

કેટલીક ખાસ ટિપ્સ સાથે 100% મીઠાઈ વાળા ની દુકાન જેવી ક્રિસ્પી જલેબી બનાવવાની રીત

ભારતમાં જ્યારે પણ મીઠાઈની વાત આવે ત્યારે મનમાં ગરમાગરમ જલેબીનું નામ પહેલા આવે છે. આવે પણ કેમ નહીં, જલેબીનો સ્વાદ હોય છે અદ્ભુત જ. જલેબી જ્યાં સુધી ક્રિસ્પી ન થાય ત્યાં સુધી તે સ્વાદિષ્ટ નથી લાગતી. .

જો તમે પણ વિચારી રહ્યા છો કે ઘરે જલેબી કેવી રીતે બનાવવી. તો ચાલો આજે અમે તમને કેટલીક સરળ ટીપ્સ સાથે મિનિટોમાં ક્રિસ્પી જલેબી કેવી રીતે બનાવવી તેની રેસિપી જણાવીશું. કેટલાક દાદીના નુસખા સાથે જલેબી બનાવતી વખતે ધ્યાનમાં રાખવા જેવી કેટલીક બાબતો અને કેટલીક એવી સામગ્રી જે જલેબીને વધુ સ્વાદિષ્ટ બનાવશે.

તો આજે અમે તમારી સાથે આવી જ કેટલીક ટિપ્સ શેર કરવા જઈ રહ્યા છીએ. તો તમે પણ તહેવારમાં ક્રિસ્પી અને સ્વાદિષ્ટ જલેબીનો આનંદ માણવા માટે આ સરળ ટિપ્સને અનુસરીને જલેબી બનાવી શકો છો.

બેટર કેવી રીતે તૈયાર કરવું : જલેબી બનાવવા માટે સૌથી મહત્વનું સ્ટેપ છે બેટર તૈયાર કરવું. તેથી જ્યારે પણ તમે તેનું બેટર તૈયાર કરો ત્યારે તમારે ધ્યાન રાખવું પડશે કે તે બેટર વધારે પાતળું ના થઇ જાય. નહીં તો વધુ પાતળું બેટર, જલેબી બનાવતી વખતે કડાઈમાં ફેલાઈ જાય છે અને જલેબી બરાબર રંધાતી નથી.

4

જો તમે સોજીની જલેબી બનાવો છો તો તમારે સોજી અને દહીં મિક્સ કરીને ઓછામાં ઓછા 15 મિનિટ માટે ઢાંકીને રાખવું. ઢાંકીને રાખવાથી સોજીમાં દહીં સારી રીતે ભળી જાય છે અને જલેબી એકદમ ક્રિસ્પી બને છે. જો તમને લાગે કે સોજીને કારણે બેટર જાડું થઈ ગયું છે તો તેમાં થોડું દહીં ઉમેરો.

દાદીમાના નુસખા : સ્વાદિષ્ટ જલેબી બનાવવા માટે સૌ પ્રથમ એક વાસણમાં સોજી અને મૈંદાને સારી રીતે મિક્સ કરી તેમાં દહીં મિક્સ કરો. હવે આ મિશ્રણમાં જરૂર મુજબ પાણી અથવા દહીં ઉમેરીને બેટર તૈયાર કરો. જો તમે મૈદાની જલેબી બનાવતા હોય તો પણ તેમાં થોડો સોજી જરૂર ઉમેરો.

જલેબીને તળતી વખતે ગેસની આંચ માધ્યમ પર જ રાખો. સોજી ઉમેરવાથી જલેબી ક્રિસ્પી બને છે. જલેબી બનાવવા માટે કોન થોડો પાતળો હોવો જોઈએ કારણ કે જાડા આકારના કોનમાંથી બનાવેલી જલેબી રાંધવામાં કાચી રહે છે અને ક્રિસ્પી બનતી નથી.

આ ભૂલો ના કરો : તરત જ બેટર તૈયાર કરીને ક્યારેય જલેબી ન બનાવો. બેટરને ઓછામાં ઓછા 20 મિનિટ સુધી દહીં મિક્સ કરીને ઢાંકીને રાખવું. જલેબીની ચાસણી માત્ર 1 તારની હોવી જોઈએ, વધુ જાડી ન હોવી જોઈએ. તેથી ચાસણીને લાંબા સમય સુધી ના રાંધશો.

જલેબીને ચાસણીમાં લાંબા સમય સુધી ડુબાડીને ના રાખો. તેને લગભગ 2 મિનિટ માટે ચાસણીમાં ડુબાડીને કાઢી લો. ખાંડની ચાસણીમાં લાંબા સમય સુધી ડુબાડી રાખવાથી તે સોફ્ટ થઈ જાય છે અને ક્રિસ્પી બનતી નથી.

આ સ્પેશિયલ વસ્તુઓથી જલેબીનો સ્વાદ વધારો : દાદીમાના ખાસ નુસખામાં જલેબીનો સ્વાદ વધારવા માટે એક સામગ્રીનો ઉપયોગ થાય છે અને તે છે કેસર, જ્યારે પણ તમે જલેબી બનાવો ત્યારે તેની ઉપર કેસરના થોડા દોરા જરૂર નાખો. આ સિવાય ચાસણી બનાવતી વખતે એક ચપટી ઈલાયચી પાવડર નાખવાથી પણ ચાસણી અને જલેબીનો સ્વાદ વધુ આવે છે.

જલેબી બનાવવા માટે સામગ્રી : મૈંદા 1 કપ, સોજી 1/2 કપ, દહીં 1 1/2 કપ, ખાવાનો સોડા 1/4 ચમચી, જરૂર મુજબ પાણી, તેલ અથવા ઘી જરૂર મુજબ, કેસરી દોરા 8 -10, ઈલાયચી પાવડર 1/2 ચમચી, કાણું પાડેલું જાડું કપડું અથવા જલેબી કોન 1 અને ખાંડ 1 1/2 કપ

જલેબી બનાવવાની રીત : સૌ પ્રથમ મૈંદા, સોજી અને દહીંને સારી રીતે મિક્સ કરીને પેસ્ટ બનાવીને, પેસ્ટને ઓછામાં ઓછી 15 મિનિટ સુધી ઢાંકીને રાખો. 15 મિનિટ પછી એક કડાઈમાં તેલ ગરમ કરો અને તેલ ગરમ થાય એટલે જલેબીના બેટરને કપડા અથવા કોનમાં ભરીને જલેબીનો આકાર આપીને કડાઈમાં રેડો.

ગેસની આંચ ધીમી કરો અને જલેબીને સોનેરી થાય ત્યાં સુધી તળી લો.ગેસની બીજી બાજુએ પાણી અને ખાંડ ઉમેરીને ચાસણી તૈયાર કરો અને તેમાં થોડો ઈલાયચી પાવડર પણ ઉમેરો. જલેબી સોનેરી થાય એટલે તેને કઢાઈમાંથી કાઢીને સીધી ગરમ ચાસણીમાં 1 થી 2 મિનિટ માટે મૂકીને બહાર કાઢીને પ્લેટમાં કાઢી લો.

કઢાઈમાંથી એક પછી એક જલેબી કાઢીને ચાસણીમાં નાખીને ગરમ ગરમ સર્વ કરો. તમે પણ આ ટિપ્સ સાથે મિનિટોમાં ક્રિસ્પી અને સ્વાદિષ્ટ જલેબી ઘરે બનાવી શકો છો અને તહેવારના આનંદને બમણો કરી શકો છો. જો તમને આ ટિપ્સ સાથે રેસિપી ગમી હોય તો રસોઈનીદુનિયા સાથે જોડાયેલા રહો.

રસોઇ ની દુનિયા
રસોઇ ની દુનિયા
ગુજરાતી સ્વાદ અને રસોઈની વિવિધ વાનગીઓ ને વિશ્વ સમક્ષ પ્રસ્તુત કરતું પ્લેટફોર્મ! - રસોઇ ની દુનિયા
RELATED ARTICLES
- Advertisment -

Most Popular

- Advertisment -
x